|
|
|
|
Новости / Новости ФНС / Налогхэр хуагъэмэщIэну?
Налогхэр хуагъэмэщIэну?
"Адыгэ псалъэ", N 76, 2010 гъэм апрелым и 28.
28.04.2010
КъБР-м и Парламентым и Президиумым
Налогхэр хуагъэмэщIэну?
Къэбэрдей-Балъкъэр Республикэм и Парламентым и Президиумым и зи чэзу зэIущIэ зэхэтащ. Ар иригъэкIуэкIащ хабзэгъэув IэнатIэ нэхъыщхьэм и УнафэщI Чеченов Ануар.
Экономикэ политикэмрэ хьэрычэт IуэхумкIэ комитетым къыхилъхьащ "КъБР-м инвестицэ лэжьыгъэ щезыгъэкIуэкI IуэхущIапIэхэм я мылъкумрэ я хэхъуэмрэ техуэ налогыр яхуэгъэмэщIэным теухуа" законым и проектыр. А комитетым и унафэщI Марьяш Иринэ зэрыжиIамкIэ, "КъБР-м и щIыналъэм инвесторхэм щагъуэт налог льготэхэм теухуа" законым и мардэхэр федерал законодательствэм пэщIоувэ. Къыхалъхьэ проектым еубзыху къэралыр инвесторым зэрыдэIэпыкъу IуэхугъуитI: и мылъкум пэкIуэ налог льготэ етынымрэ и хэхъуэм пэкIуэ налогхэр хуэгъэмэщIэнымрэ.
А комитетращ зи жэрдэмыр "КъБР-м и республикэпсо бюджетымкIэ щIыхуэ зытелъ IуэхущIапIэхэм я Iуэхур судым нэсын и пэкIэ зэретхьэкъу щIыкIэм теухуа" законым и проектри. Абы еубзыху къэралым къалэн зыщищIа органхэм а законым къигъэув хабзэхэр зэрагъэзэщIэн хуей щIыкIэр, щIыхуэ зытелъ IуэхущIапIэр банкроту лъытэным и Iуэхур, абы ехьэлIа етхьэкъукIэхэр зэтреIыгъэ, ахъшэр зратыжын хуейм и лъэIу тхылъыр Арбитраж судым щIилъхьэху.
ЛэжьыгъэмкIэ, социальнэ политикэмрэ узыншагъэр хъумэнымкIэ комитетым и унафэщI Жанатаев Сэлим и жэрдэмкIэ, зэIущIэм щыхэплъащ "КъБР-м и къэрал дамыгъэхэм" ятеухуа законым и 35-нэ статьям зэхъуэкIыныгъэхэр хэзылъхьэну проектым. Афганистаным щызэуахэм хуагъэфэщар СССР-м и Совет Нэхъыщхьэм и Президиумым и тхылъщ армыхъумэ, СССР-м и Совет Нэхъыщхьэм и Президиумым и щIыхь тхылъкъым, "Къэбэрдей-Балъкъэр Республикэм и къэрал дамыгъэхэм я IуэхукIэ" законым и 35-нэ статьям зэрыщытхам хуэдэу. ИтIани, абыхэм, къэрал дамыгъэ зыхуагъэфэщахэм хуэдэу, ахъшэ ират. Законым и проектым а щыуагъэр егъэзэкIуэжри, зауэлIхэм ахъшэ иратыныр къезэгъ ещIыж.
Къэбэрдей-Балъкъэр Республикэм и Правительствэм Парламентым зыхуигъэзащ, Бахъсэн куейм и муниципальнэ мылъкум къэрал объект зыбжанэ уасэншэу хэгъэхьэжынымкIэ депутатхэр арэзы хъункIэ гугъэу. Парламентыр а Iуэхуми Хэку зауэшхуэм хэта ветеранхэр псэупIэкIэ къызэгъэпэщыным ехьэлIауэ Ленинград областым и Хабзэгъэув зэхуэсым Къэрал Думэм зэрызыхуигъэзами хэплъахэщ.
УРЫСМАМБЭТ Беллэ, КъБР-м и Парламентым и пресс-IуэхущIапIэ.
Разместить:
© 2006-2026 Российский налоговый портал.